A sakmin Lamka ‘Khopi’
Wednesday, March 4, 2009

I kisaktheihpih mahmah uh leh a sakmin i lohchimlouh uh Lamka khopi; gam khangtou lellel India a state tuantualpen leh golhgukna a hatnapente lak a khat Manipur ah district headquarter khat a hisam hi. Manipur a district headquarter dangte a tuantual mahmah ziak uh hia, ahihkeileh, Lamka a changkan ziak hia, Manipur a di’n state capital Imphal zom in khopi lianpen nihna ahi laizommah hi. State tuantual leh golhgukna a hat mahmahna a state capital zom a khopi lianpen nihna!? Kisaktheihpihhuai mahmah.

Lamka ‘khopi’ a hihna tak i et nawn chiang in, tunitan in kingakna taak electric meivak i nei naikei uhi. Inverter a battery gentaklouh a chang in mobile phone battery charging-na khop leng hun tamtak a electric pailou ahi. Electric a pai sunsun chiang in leng kholai (Tedim Road dung saulou chauh le hisim mai) lamlian dung a streetlight-te leng haa bal mah bang in a lak lak ah vak tektok ua, a zuun ding lam a kisaipihte’n phawk nawn hetlou uh a bang hi. Transformer khat a kangsia a lah, a hon bawlsak uh ngakzoh ding vual ahihlouh ziak in a zangkha mipite’n sum kithohkhawm a bawlsak a ngai maimah sek hi. I theihchiatsa uh himahleh, kingakna tham ching mahmahlou ahihdan mimal a generator service bang leng om i hihna uah chiang mahmah ahi. Khominthang a power sub-station thak ah lametna lianpi om mahleh, ‘bangtan a hong hoih tuanna diam maw…’ chihna lungsim pen tuchiang in dik mahmah leh a kilawmta ahi. Hiai ahi Lamka ‘KHOPI’..

Tuinek toh kisai a Lamka mipite kingakna lianpen ahihleh Koite lui apat tui kizawl pen leh Lanva lui apat Bungmual tuizempi a tui kizawllut pen ahi i chithei naikei ua, Tuitha lui apat kizawl ding pen bang tuh a min loh phak leng hi nailou ahihman in, tunitanpha in leng tuikul tui mah a kinga ngen i hi tangpi uhi. Hinna nei khempeuh a ding leng hithou mahleh, a diak in mihingte a di’n tui khenkhiakna ding, tui sik-le-tang a zat ding khovel ah thil dang bangmah a omkei hi. Mai phiatna ding tui a omkei a munphiah in mai ka phiat mai ding bel i chi thei maitheina ua, himahleh, tui dawn ding a omkei a ann ka ne mai ding chi thei i om uh a gintakhuaikei hi. Hichituk a mihingte a dia thil poimoh, a thakhengtu ding dan omlou himahleh tunitan in kingakna tham tuinek kiningching i nei naikei uhi. Rickshaw-pu hunkhop in sum muhna a neihloh ua a hoih ahimai i chihtheih leh thutuam, huchilou in bel, i dinmun uh hichi lel ahi. Hiai ahi Lamka ‘KHOPI’

I district pumpi ua a zattheih hamham sorkar’ damdawi inn i neih sunsun uh, CCpur Distict Hospital lah, a gen gen leng chimtakhuai khop in deihthusam a batna ding gamla mahmah lai a, a lungtunhuai kei mahmah hi. I lamlian leh lampite uh leng deihthusam tung mahmahlou, postal service lah ginalou (interview call letter a kikhel nung a mu leng hunkhop omta), internet service leng hoihtaktak tuanlou, mobile service leng buai deuh gige, banking service lam lah UBI toh SBI branch khat tuak chauh om, oil pump leng a kidaihlouh luat ziak a ‘black’ a thautui zuak tam petmah, ann huanna ding LPG lah kiningching chih om ngeilou, dan leh thupiak enkaitute lah…vang mahmah uh chimai ni. Govt. deptt. teng leng a vek phial ua a muihlou chauh ngen hi zomah. Simtute lak ah a hoihlam gen ding thei tamtak i om tham ding ua, himahleh, tua i gente behlapna ding thei tamzaw himhim di’n a gintakhuai hi. Vangtahhuaitak in, hiai ahi Lamka ‘KHOPI’.

Hichibang lel i dinmun uh kisaktheihpihhuai mahmah! ‘Singtang’ i chihte uh toh a kikhiakna neulo mahmah ahihman in ‘khopi’ kichih ding leng a diktak in kisuanlahhuai ahi. Manipur a dia khopi nihna i hihkhak zenzen uh leng Lamka a changkan ziak hilou in district headquarter dangte a tualtual ziak uh ahizaw a, election a a nihna a pang toh kibang ihi uhi. Alehlam ah, a kikhel bangmah a omkei a, deihtelna zang thei lai i hihman un, ‘khopi’ (town) kichih tawpsan a ‘singtang khua’ dan a om vet ding hia, ahihkeileh, kisuanlahna ding om hetlou a ‘khopi’ mah kichih theihna dia panlak ding chih tel ding ahimai ahi. Amasapen i telzawk ua leh bel haksatna ding bangmah a omkei dia, ‘singtang khua’ di’n changkang mahmah i hiding uhi. Kisuanlahna ding om hetlou a khopi mah kichihtheih i ut ding ua leh bel nasatak a panlak a ngai dia, lungkimlouhna ding leng a tam mahmah ding hi. Himahleh, i panlakna ziak in bel khantouhna lam i manoh himhim ding uhi.

Source: http://zogam.com/index.php?option=com_content&task=view&id=5487&ac=0&Itemid=2

Posted by ZOLENGTHE 12:23 PM    

Labels: Asia, Churachandpur, Imphal, India, Lamka, Manipur, Provinces, Society and Culture, Tedim

0 comments:

Post a Comment